腰果西芹炒蝦仁

雪櫃有包腰果好耐,以為過期,但放涼再用鹽炒一炒又脆番喎,咁就整西芹蝦啦,正

香煎沖繩五花腩

小妹之前話買沖繩五花腩2盒送帶子,就係呢隻,唔洗醃,煎好灑海鹽,再包生菜食,正到冇朋友,家人話好耐冇食過咁有豬味五花腩片,本想買多4盒放係雪櫃慢慢食,但佢買咗3日就冇晒啦,改買雪花肥牛,希望佢下次再有啦.

煎三文魚伴玉豆

天氣太熱,不想煮飯,得我三個女人就一人一份呢個餐就算,我自己會加碟芥未醬沾來食,滿足.

沙茶醬京葱炒肥牛

剩下半磅安格斯牛,加條京葱,沙茶醬,蠔油炒,家人話好野味,牛肉又好滑.

蒸海班

 

見有60元一份3條海班,但唔記得問係乜班,又新鮮,買嚟蒸,真係好正

照燒汁炒新鮮雞扒

用了兩隻新鮮雞脾去皮,一開四,用鹽醃一醃,先煎香皮至金黃同去油份,再慢火煎焗熟雞肉,炒香洋葱,下汁:蠔油,日式燒汁,糖,少少上湯,回雞件收汁即可,家人好愛咁食,好似去日式飯店食照燒雞汁飯咁,不過佢話下次多少少汁伴飯食喎,收到.

蒜蓉帶子龍躉腩蒸粉絲

係一田買兩盒沖繩五花腩送兩隻有殼帶子,食過五花腩好食諗住買多兩盒送多兩隻帶子咁就有四隻蒸,怎知第二日冇晒,改送雞翼,咁我都有買多兩盒五花腩,因真係好好食,帶子得兩隻太少,咁我見魚佬新鮮劏龍腩就買多件龍躉腩切片,加粉絲蒸,咁樣咪夠魚食囉,而且咁樣夾埋蒸令魚件仲多份鮮甜,粉絲更加係精華啦,但我最愛係龍腩上面塊骨膠原呢,食完好滑滑呀..............

沙茶醬炆白蘿蔔肉片

我係用沙茶醬炆,加味噌,少少蠔油,魚露,水,糖炆,肉係用火鍋肉片,唔洗醃加,炆好蘿蔔先,再炒香肉片,回蘿蔔連汁,再收少少汁,要多汁可以唔收,又好味又好送飯.

煎薯件伴澳洲和牛漢

 

有時家人冇食飯會咁樣食,一人一份,炒多一份大大碟菜,呢隻澳洲和牛漢非常好食,一個39.9,媽媽同妹妹都話好有牛香,但冇我份呢,我要戒口呀,但見佢哋食得開心我都好開心呢.

蒸深水泥鯭

呢隻係魚檔老闆介紹比我,呢兩40元,又試吓,估唔到咁好食,好有魚味,媽媽超讚.

豆卜炆鯇魚

呢個菜我想好多家庭都整過,但媽媽以前係唔會煎吓魚才炆,佢係蒸好再加豆卜炆,到我自己懂煮喜歡係煎一煎魚表面才加豆卜,豆卜會加蒜片,薑片,上湯1盒,魚露細火炆10MIN入味,煎香魚皮,再細火煎焗魚肉約10MIN,此時應有9成熟,再回豆卜上湯大火2-3min至出奶白湯就可成煲上,咁樣有湯又可伴飯食,魚肉煎過會好食好多.

白焯海蝦

係魚檔有平買海蝦買,呢度30元,焯咗一隻食超新鮮鮮甜,媽媽話不如今晚白焯啦,我當然話好,自己整多個伴醬,係炸香蒜粒同乾葱絲,即將熱油淋落切碎芫茜同葱粒伴均,加蠔油,魚露,少少糖,生抽,水伴至自己口味即可,佢哋話個汁好好食喎,但小妹食唔到蝦,自己扁桃腺發炎一排啦,要介口,冇法,最緊要佢哋食得開心呢

荷葉蟲草花蒸雞脾件

買咗2盒雞脾仔,想蒸荷葉,切件伴味噌,魚露,生抽,鹽,蟲草花蒸,蒸起個汁超好味,伴飯好好食,雞脾件又嫩滑,淡淡肉,家人好愛

薑葱蠔油煎蠔

係樓上舖買咗包急凍廣蠔,會員46一包,出咗水,沾粟粉煎香表面,再燴番個薑葱蠔油汁,好食,唔錯,好有蠔味,因唔新鮮的急凍蠔係好腥架....

冬瓜雞腳冬菇木耳扁豆白果芡實乾貝粟米豬展湯

之前買咗份雞腳,但因家人傷風冇煲到,而在冇事想起配冬瓜一定好夾,就煲,加多份木耳個個食埋去油份,呢個湯超甜,好正,但煲雞腳唔好去腳甲,唔係會好油.

苦瓜南瓜蛋餅

超好味,估唔到苦瓜加南瓜咁夾,但食起都有少少苦瓜甘香,如果唔受得唔好落呢,但我家人超愛,我仲加多2湯麵粉加少少水麻油伴均蔬菜料加蛋伴均,再煎,小心呀,初初要慢火煎焗,因全部材料都係生,耐心地煎就會有好好味蛋餅食啦.調味只用少少魚露,食時灑椒鹽食,正................