鮮淮山味噌炆雞

鮮淮山好有益,健脾開胃,伴雞炆好好食.

紅燒沙茶醬豆腐白鰂腩

父母親好愛食白鰂腩,一來滑,二來冇乜骨,好放心佢哋食,而家多數會係炆腩食,另一面用嚟煲冬瓜蓮子湯,甜到不得了,今次加沙茶醬,汁更鮮.

多多菠菜蛋餅

可能天氣熱,最近家人好愛食蔬菜蛋餅(青瓜,苦瓜,菠菜輪流整),我就最愛菠菜蛋餅,但係愛多多菠菜料少少蛋,上面係一斤菠菜,兩隻蛋,加蝦皮魚露調味,就可整到滿滿菠菜蛋餅啦,正

XO醬炒西芹花甲肉

係商埸有買鱷魚肉檔舖,見佢有好大粒蜆肉,老闆話呢隻係花甲蜆,冇沙,35元兩包,我成日都想買,因知道蜆肉對眼好好,對家人有益,但冇人食過我又唔敢買,不過見佢好靚仔又試吓,用xo醬,魚露炒佢,家人話好好食,又冇沙,我炒咗半包,佢哋話唔夠食,下次炒晒佢囉,小妹覺得用佢炒濃味小炒係好好送酒食物會食唔停口架.

鹵五花腩伴糖心蛋

 

媽媽話我好耐冇整五花腩過佢嘆,我當收到,即整,我會煎一煎伴腩金黃,都係右加老抽,生抽,上湯,五香粉(本想加八角,花椒,桂皮,但用晒)細火30鐘,關火焗30分鐘,重覆2次,咁就好鬆化加啦,最正係皮位,好骨膠原,真係正到冇朋友呀....我最愛炆過肉汁,好香,留番細半碗明天炒芽菜烏東一流呀

 

大地魚粉魚露雞翼

家中有一大樽老友記大地魚粉,而家整肉餅,煮魚湯煲,菜湯煲都會加1-2湯落去提鮮,咁整雞翼時想起有味係鯷魚雞翼,同大地魚一樣係鮮味,又加1大湯落去醃,加魚露生抽,煎出嚟雞翼真係好鮮味,妹妹話一邊煎時己聞到好香鮮味,同我平時煎味唔同,咁以後醃雞時都加去醃啦,大家又試吓.

鯇魚頭煲

父母親己愛上食魚頭煲,妹妹一樣,我當然樂意整比佢哋嘆,相熟魚老闆仲幫我每星期留六個魚頭比我,每星期就整一次佢哋食腦啦,媽媽話佢食完聰明過我添,咁當然好啦.....上次加豆腐,但我覺唔加就咁用汁燴魚頭仲正.

薑葱屈白鰂腩+白鰂冬瓜蓮葉蓮子白合粟米湯

 

聽人話食白鰂有益,咁我多數煲白鰂比家人飲,但就冇食,咁我請魚老闆幫我起個白鰂魚腩比我,剩下魚件煲冬瓜湯,腩就用類似薑葱屈鯉魚方法整,家人話魚腩超滑,白鰂只有魚腩位冇乜骨,其化他部位好多骨,多骨魚煲湯係特別甜架.

 

太焗熱,發燒中......大家保重

荷葉肉碎乾貝蝦皮紅蘿蔔絲蒸飯

以前多以雞粒蒸,今次用肉碎,一樣好食,因買咗一大包蝦皮,每次加點蒸去蒸飯好好食呀,現在暑熱,蒸吓荷葉食物好有益叱呢

魚頭金鑪絲瓜湯煲

天氣太熱,整個魚湯菜煲伴飯食,有魚有菜有湯乜都有,買咗一條金鑪起魚肉,剩下魚骨唔夠,要多兩個鯇魚頭,個湯甜到離晒譜,加上今次絲瓜起靚,家人邊食係咪話甜,甜,甜...............

滾起湯魚骨件都好好食架,沾豉油食,呢餐夠晒食呀.

淡色豉油雞

 

之前隻豉油雞太深色,昨天又整過,調整番個色,呢個妹妹好滿意,話係酒樓整顏色喎.

呢個係之前,妹妹話黑到唔知自己夾乜食喎??????????

 

煎炆豆腐鯇魚頭

呢個一定要介紹比大家,以前媽媽多數買大魚頭蒸或炆,但因我哋個個太愛食魚頭邊邊(唔記得乜名),好滑滑部份,有次係中山姑姑叫了個煎焗魚頭,我以為係大魚頭,原來係鯇魚頭最滑部份,嘩不得了,我自己都食咗4個魚頭,佢整得好好食,但自己當然不懂煎啦,咁我係街市問魚老闆要了份鯇魚頭,唔係成日有架,要之前講定留比我,我用鹽,蒜粉,蛋黃,生粉醃,若有最好加蛋黃醃,因煎起嚟真係好金黃同食落有份香鮮味架,先煎焗魚頭約20分鐘,唔可以急,唔係唔熟架,包仔豆腐煎定金黃,魚頭吸油份,鑊中落煎香蒜片,葱段,薑片,芹菜,面放回魚頭同豆腐,灑酒,回汁:400上湯內加蠔油,生抽,糖,中大火煮約5-8min,試味同試吓魚頭係咪你想要淋度,我冇埋芡,因想用佢汁伴飯食,有6個魚頭一人有一個唔洗淨食啦,呢度都係25元,底食...成煲最快ko晒,我好開心,佢哋話又香又好味,我就最愛食豆腐,超好味...............

ps:汁唔好落太咸,因魚頭己醃,最尾唔咸先加鹽,太咸冇得補救架.

西芹炒蝦

浸白菜加多個炒蝦又一餐啦,跟住睡一回看冠軍戰,yeah....

上湯肉丸浸鶴藪白菜

好愛食呢種鶴藪白菜,次次都好淋甜,我用上浸加肉丸煮,個湯仲可伴飯食,好正,加上天氣熱,不想食太油食物,呢個湯加米粉or米線一樣好食

蝦皮芫茜苦瓜蛋餅

小妹好愛呢個方法整蔬菜餅,之前整過菠菜餅,家人話整苦瓜餅,當然可以呢,我仲加埋蝦皮,因係樓上店買咗一大包,加埋芫茜,唔食肉同餅就咁食佢都超包肚,但煎時要比耐性,唔可以大火,要慢慢火咁煎完一面才番第二面,苦瓜片我冇出水,係切簿片伴均蛋液,芫西,炒香蝦皮慢火煎香,咁個蛋餅才熟同淋身軟滑架,可能有蝦皮同蛋鮮味,完全食唔出苦瓜苦味,好正呀

 

燒汁鯖魚

天氣熱最拍去魚檔,最好係係冰箱睇吓有乜魚食,見買咗好多包鯖魚更係清一清佢啦,最愛燒汁燴佢食,妹妹話好似日式鰻魚飯咁味道,正.

老黃瓜赤小豆粟米鴨腎豬尾骨湯

天氣太焗,煲個消暑去濕湯飲吓先,老黃瓜好夾鴨腎味,飲完家人話正呀,

輕鬆下午茶

難得有天下午有時間同媽媽係pacificcoffee一齊下午茶,媽媽係家中好難說心事,我就做聆聽者,滿足,唔好食個肉腸,太重黑椒啦,個newyorkchese cake好好味.

紅肉火龍果

小妹真係未食過,但見個個都話好有益咪買比家人食吓,呢度28兩個,食落係爽,清甜,唔錯,但食完成鵬牙好似吸血鬼咁,嘴唇仲好紅,都係係家中食好,佢顏色好美,相信佢整甜品一定好靚,

菠菜蛋餅

簡單一個小食己成為我晚餐,滿足....

以前都冇咁喜歡的公仔現在超愛佢,不知為何,可惜細細一個citysuper己買百多元啦,太貴啦,唯有間唔中去看吓算啦.有冇人同我一樣好愛佢呀.

 

冬瓜冬菇雞腳蓮子木耳豬展湯

父親好愛飲冬瓜雞腳湯,咁我會儲起蒸咸雞雞腳,因小妹覺佢蒸時己蒸晒油份,煲起嚟冇咁油,又真喎,我妹都話今次冇上次咁油(上次用街市雞腳)儲夠4對就煲,但我堅持加木耳同冬菇,去油嗎,明天小暑,大家煲嚟飲吓,小妹覺得日日熱到似大暑多過小暑呢.........

煎海馬頭

呢隻魚係街市見到係麻麻好樣,但好多人食過話好正,但佢唔洗打鄰,回家用鹽魚醃一醃煎,食時再去皮,佢魚油係保持係裏面架,滑到不得了,之前試過蒸,但小妹都係覺煎好食好多

 

 

豉油雞

用少少鹽同酒醃一醃

最近係食呢隻龍崗雞,係一田買,原83,特62,佢好有雞味,每次特價都好多人買

 

先煮好底汁:生抽60ML,老抽50ML,冰糖4大湯,紹洒2湯,香料:八角一粒,花椒半湯,桂皮,月桂葉1片,雞湯2碗或水都可以

 

雞出水,再淋冰水.再回煮滾豉油汁,先不斷淋汁係雞肚內,約兩分鍾,再每邊超細火炆焗10MIN,每5分鍾不斷淋1分鍾落雞身,再蓋蓋

呢個係過咗15分鍾

呢個係45MIN

1小時後完成汁盛係好少,但夠啦,

取出雞放涼10-15MIN才斬

食得,昨晚超熱整呢個自己都冇胃口啦,但家人全碟KO晒,我好開心,佢哋話個汁超好食,我都係撞吓撞吓咋,我係啊Q精神,唔好咪下次再做好D囉,最緊要隻雞熟就得啦,今次係剛剛熟,好滑呀.

雞汁雞件炒絲瓜

一直都覺絲瓜淡口,一定要有魚湯或蒸過雞的汁炒才好味,前天有蒸雞,剩下雞汁同雞件炒,超好味,同有雞油炒過絲瓜好滑口.